Што да јадете, а што да избегнувате за време на големи горештини

За време на екстремно високи температури, начинот на исхрана има клучна улога во тоа како организмот се справува со топлината, покажуваат препораките на стручњаци за исхрана и здравје. Летните горештини го зголемуваат губењето на течности и електролити, па затоа е неопходно да се избира лесна, хидрирачка и нутритивно балансирана храна.

Според нутриционистичките препораки, во текот на топлотни бранови најдобро е да се консумираат намирници со висок процент на вода, како што се лубеница, диња, краставици, домати, зелена салата и тиквички. Овие намирници помагаат во хидратацијата на организмот и истовремено обезбедуваат витамини, минерали и електролити кои се губат со потењето.

Посебно се препорачуваат лесни оброци како супи, чорби, јогурт и ферментирани млечни производи, како и варен или грилуван зеленчук. Таквата храна го олеснува варењето и го намалува дополнителното создавање топлина во телото, што е важно во периоди на високи температури.

Од друга страна, експертите предупредуваат дека треба да се избегнува тешка, мрсна и пржена храна, бидејќи таа го оптоварува дигестивниот систем и дополнително го зголемува чувството на топлина. Исто така, се препорачува намалување на внесот на алкохол и кофеин, бидејќи тие можат да придонесат за дехидратација.

Стручњаците истакнуваат дека и распоредот на оброци е важен – пообилните оброци е подобро да се консумираат рано наутро или навечер, додека во најжешкиот дел од денот се препорачуваат лесни ужини и зголемен внес на течности.