Skip to content
Милијардерот Илон Маск, близок советник на новоизбраниот претседател на САД, Доналд Трамп, повторно ја изрази својата целосна поддршка на екстремно десничарската Алтернатива за Германија во разговор во живо со политичарката на АфД, Алис Вајдел.
„Само АфД може да ја спаси Германија. Крај на приказната. И луѓето навистина треба да застанат зад АфД, инаку работите ќе станат многу, многу полоши во Германија“, рече Маск.
Маск претходно ја поддржа AfD во објава на X, платформата за социјални медиуми што ја поседува, и во колумна за мислење во германскиот весник Велт.
Коментарите на Маск предизвикаа гнев кај многу други германски политичари, кои сметаат дека АфД е надвор од политичкиот мејнстрим.
Кампањата на милијардерот во име на АфД, заедно со навредите што тој ги упати кон други германски политичари, ги натера критичарите да го обвинат дека се обидува да го искористи своето влијание за да се меша во германската политика пред претстојните национални избори на 23 февруари.
За време на разговорот, Вајдел, зад која се гледаше МАГА капче ја осуди поранешната германска канцеларка Ангела Меркел, ја нападна германската миграциска политика, тврдеше дека некогаш пофалениот образовен систем на Германија е сведен само на учење на левичарска пропаганда за полот и ги обвини муслиманските имигрантите за, како што рече, голем пораст на криминалот.
Вајдел рече дека Меркел „ја уништи, во основа, нашата земја“ и рече дека поранешната канцеларка, членка на централно-десничарските Демохристијани, всушност била политичар на Зелените.
Конкретно, Вајдел и Маск ја критикуваа Меркел за нејзините одлуки за миграциската политика во 2015 година во услови на голем прилив на мигранти од Сирија и од други места.
Вајдел ја обвини Меркел дека ги отворила границите на Германија против народната волја. Таа, исто така, остро ја критикуваше Меркел за, како што ја нарече „непристојна енергетска политика“, вклучувајќи ја и одлуката на Меркел постепено да ја укине нуклеарната енергија во Германија.
Маск рече дека е главен поборник за обновлива енергија, но ја нарече германската одлука за затворање на нуклеарните централи „трагична“ и рече дека Германија треба наместо тоа да го смени курсот и да го зголеми производството на атомска енергија.
Маск, производител на електрични автомобили „Тесла“ има голема фабрика во Германија лоцирана веднаш надвор од Берлин, ѝ се придружи на Вајдел во обвинувањата против, како што рече, надуената германска владина бирократија и високите даноци.
Маск рече дека барањата на Тесла за дозволи за изградба на фабриката биле долги повеќе од 25.000 страници и морале да бидат поднесени во хартиена форма, со повеќе копии. Тој исто така рече дека службеник морал рачно да ја печати секоја страница од обемните документи.
Вајдел, исто така, им одговори на активистите против АфД кои ги етикетираат членовите на партијата како „нацисти“ со тврдењето дека поранешниот нацистички диктатор на Германија, Адолф Хитлер, „бил комунистички социјалист“ и дека АфД, како „конзервативно-слободна партија“, е „ токму спротивното“.
Всушност, нацистите ги прогонуваа комунистите и социјалистите.
Маск, исто така, го опиша Хитлер како „социјалист“, велејќи дека диктаторот ги „национализирал индустриите како луд“. Насловот на нацистичката партија беше официјално Национал-социјалистичка германска работничка партија.
Понекогаш бурниот разговор на англиски, исто така, вклучуваше долги коментари од Маск за можноста луѓето да го колонизираат Марс и далечните соларни системи, како и за заедничката несигурност на Маск и Вајдел за постоењето на бог.
Маск потроши стотици милиони долари за поддршка на изборната кампања на Трамп, а Трамп вети дека ќе го назначи Маск на чело на новосоздадената агенција чија цел е намалување на големината на американската влада.
