Зеленски: Кинески државјани заробени како се борат за Русија во Украина

Претседателот на Украина, Володимир Зеленски, изјави дека украинските сили заробиле двајца кинески државјани кои се бореле на страната на Русија во источна Украина — откритие кое може да го загрози кревкиот напор за мировен процес во третата година од војната.

Во објава на социјалната мрежа Х, Зеленски сподели видео од еден од заробените и рече дека Киев располага со информации дека „има многу повеќе кинески државјани“ во редовите на руските сили. Не е познато дали Украина смета дека Кина ги испратила овие борци по сопствена наредба.

Иако Пекинг е блискиот дипломатски сојузник на Москва, не постојат јавни докази дека директно ја поддржал инвазијата врз Украина. Ова е прва јавно објавена информација за присуство на кинески борци на страната на Русија. Од Министерството за надворешни работи на Кина засега нема одговор, а ниту тврдењата на Зеленски не се независно потврдени. Украинскиот претставник Андриј Коваленко од Советот за безбедност на Украина ги нарече борците „платеници“, без да даде дополнителни детали.

Зеленски ја искористи оваа вест за да ја повика администрацијата на американскиот претседател Доналд Трамп на построга политика кон Москва, особено додека траат билатералните разговори меѓу САД и Русија, кои Киев ги гледа со сомнеж. Според него, украинските сили имале контакт со вкупно шест кинески борци. Тој изрази надеж дека оваа ситуација ќе ја зајакне американската поддршка за Украина: „Се надеваме дека после ова Американците прво ќе разговараат со Украинците, па дури потоа со Русите“, рече тој.

Во заеднички брифинг со белгискиот премиер Барт де Вевер, Зеленски додаде: „Севернокорејците се бореа на фронтот во Курск, но Кинезите се бореа на територија на Украина.“ Русија сè уште нема дадено официјален коментар за оваа ситуација. Украинскиот министер за надворешни работи, Андриј Сибија, соопшти дека кинескиот дипломат во Киев бил повикан на разговор, каде Украина побарала објаснување. И покрај тоа што Пекинг јавно вели дека сака да посредува во решавањето на конфликтот, „безграничното“ партнерство со Русија останува пречка за вистински неутрална улога.