МААЕ истражува наводен напад со беспилотни летала во Запорожје

Меѓународната агенција за атомска енергија (МААЕ) истражува извештаи за наводен напад со беспилотни летала во близина на окупираната нуклеарна централа Запорожје во Украина.

Според операторот на електраната, оштетени се возила, објави агенцијата со седиште во Виена.

Во извештајот за инцидентот, операторите на централата навеле дека во нападот, што наводно се случил во петокот, биле вклучени шест беспилотни летала.

Инцидентот се случил надвор од периметарот на електраната, приближно 600 метри од најблискиот реактор, соопшти МААЕ.

Запорожје е најголемата нуклеарна централа во Европа. Нејзините шест реактори се затворени веќе некое време поради руската инвазија на Украина што започна пред повеќе од три години.

Тим на МААЕ во петокот прегледал камион што наводно бил погоден од беспилотно летало. Меѓутоа, тимот не можел да ја потврди штетата или да ги пронајде остатоците од беспилотното летало, бидејќи биле предалеку од возилото. Сепак, забележале изгорена трева и друга поцрнета вегетација.

– Доколку овој извештај се потврди, тоа би претставувало целосно неприфатлив напад во близина на голема нуклеарна централа, изјави генералниот директор на МААЕ, Рафаел Гроси, додавајќи дека „кој и да стои зад ваквите напади, си игра со оган. Ова мора веднаш да престане“.

Шефот на МААЕ предупреди дека премногу дронови летаат опасно блиску до нуклеарните централи на Украина, загрозувајќи ја нуклеарната безбедност.