Skip to content
Австралија и Велика Британија потпишаа нов билатерален договор за одбрана, кој ќе важи во наредните 50 години и кој има за цел да ја зајакне трилатералната безбедносна рамка AUKUS со САД. Договорот доаѓа во момент на преиспитување на пактот од страна на Вашингтон и ја нагласува цврстата посветеност на Канбера и Лондон кон заедничката стратегиска визија за Индо-Пацифичкиот регион.
Според заедничкото соопштение, договорот опфаќа соработка во сите фази на развој на нуклеарните подморници – од проектирање и изградба, до експлоатација, одржување и крајна декомисија. Предвидени се и пристанишни посети и ротациско присуство на британска подморница во базата кај Перт, западна Австралија.
Овој билатерален договор се надоврзува на веќе постоечката тристраната рамка објавена во 2021 година, според која Австралија треба да набави нуклеарни подморници од САД во почетокот на 2030-тите, додека првите подморници од домашно производство се очекуваат во 2040-тите години.
Во јуни годинава, САД најавија ревизија на AUKUS договорот, со цел негово усогласување со политиката „Америка на прво место“ на претседателот Доналд Трамп, што отвори прашања за иднината на пактот.
Британскиот министер за одбрана Џон Хили, на церемонијата во Џилонг, изјави дека новиот договор ќе придонесе за зацврстување на безбедноста во Индо-Пацификот и ќе ја засили улогата на НАТО на глобално ниво.
