Skip to content
Израелските напади усмртија најмалку 71 Палестинец кој се обидувал да добие хуманитарна помош во услови на влошена хуманитарна катастрофа и масовна глад во Појасот Газа, соопштија медицински извори за „АлЏeзира“. Истовремено, болниците во опколениот регион пријавија уште седум смртни случаи поради глад и неухранетост.
Според Канцеларијата за медиуми на Владата на Газа, најмалку 51 лице било убиено, а повеќе од 648 ранети од израелските сили во средата, додека се приближувале до преминот Зиким на северот од Газа, каде што се очекувале камиони со помош.
Наспроти јужниот град Кан Јунис, уште 20 лица биле убиени додека барале помош во близина на таканаречениот коридор Мораг, соопшти Медицинскиот комплекс Насер.
Повеќе од 1.000 Палестинци биле убиени во близина на пунктовите за хуманитарна помош од почетокот на операциите на Фондацијата за глобална хуманитарна помош (GHF), која е поддржана од САД и Израел, и започна со работа во мај. Организацијата е остро критикувана од страна на ОН и други хуманитарни организации поради недоволно снабдување со помош и поради недостигот од безбедност околу дистрибутивните точки.
ОН и здравствените власти предупредуваат на драматично зголемување на гладот, особено меѓу децата и повозрасните лица. Министерството за здравство на Газа соопшти дека 154 лица, од кои 89 се деца, починале од неухранетост, најмногу во последните неколку недели. Глобалниот монитор за глад изјави дека ситуацијата се развива кон отворено сценарио на глад.
Меѓу оние кои се борат за опстанок е Џихан ал-Кураан, мајка која за „АлЏезира“ изјави додека ја држеше својата мала ќерка: „Погледнете ѝ го стомачето! Нема месо, само коски, цел месец без леб.“
Таа вели дека се обидела да најде храна во преполна народна кујна, но се вратила со празни раце. „Најдов само неколку суви парчиња макарони на подот“, рече таа.
И покрај растечките потреби, помошта што пристигнува во Газа е далеку од доволна. Портпаролот на УНРА, агенцијата на ОН за палестинските бегалци, Аднан Абу Хасна, изјави за „АлЏезира“ на арапски јазик дека „токму сега, помошта што влегува во Газа не допира до најголемиот дел од населението“.
ОН проценуваат дека на Газа ѝ се потребни меѓу 500 и 600 камиони дневно за да се задоволат основните хуманитарни потреби. Сепак, само 269 камиони влегле во територијата во последните четири дена.
„Поголемиот дел од тие камиони беа ограбени од гладни толпи“, извести Тарек Абу Азум од Газа. „Ограбувањето на помошта веќе не е шокантно. Тоа е очекуван исход по долг период на глад и недостиг од вода, храна и медицински средства“, додаде тој потенцирајќи дека бројот на камиони кои пристигнуваат не ги задоволува потребите на населението.
Преземено од Мета.мк
