Skip to content
Лидерите на Европската Унија издадоа заедничко соопштение пред самитот САД-Русија овој петок за да ја истакнат својата непоколеблива поддршка за Украина. Сите лидери на ЕУ го потпишаа текстот, освен Унгарија, која имаше резерви кон идејата.
Во соопштението на 26-те земји од ЕУ се поздравуваат напорите на претседателот Трамп за „запирање на агресивната војна на Русија против Украина и постигнување праведен и траен мир и безбедност за Украина“.
Лидерите истакнаа дека е потребен траен мир со почитување на меѓународното право, истакнувајќи го територијалниот интегритет на Украина.
„Меѓународните граници не смеат да се менуваат со сила“, – се вели во соопштението.
Текстот, исто така, даде јасен знак дека ЕУ е подготвена да обезбеди понатамошна политичка, финансиска и воена поддршка на Украина за нејзина самоодбрана и побара безбедносни гаранции за Киев. Покрај тоа, тие ветија поддршка за патот на Украина кон членство во ЕУ.
Соопштението го изготви претседателот на Советот на ЕУ, Антонио Коста, а лидерите го одобрија синоќа. Но, Унгарија одби да го потпише.
„Унгарија не се поврзува со оваа изјава“, – заклучува текстот.
Кратко по објавувањето на изјавата на ЕУ 26, унгарскиот премиер Виктор Орбан објави објава на својот профил X, оправдувајќи ја својата одлука:
„Пред либерално-мејнстрим хорот да започне со својата најнова изведба на нивната омилена мелодија „куклата на Путин“, решив да споделам зошто НЕ можам да ја поддржам изјавата во име на Унгарија“, – напиша Орбан.
Премиерот истакна три точки:
1.Соопштението се обидува да постави услови за состанок на кој не беа поканети лидерите на ЕУ.
2.Фактот дека ЕУ беше оставена настрана е доволно тажен. Единственото нешто што може да ги влоши работите е ако почнеме да даваме инструкции од клупата.
3.Единствената разумна акција за лидерите на ЕУ е да иницираат самит ЕУ-Русија, врз основа на примерот на состанокот САД-Русија. Да му дадеме шанса на мирот! – го заврши својот пост Орбан.
