Ропке: Сакаме во следните години кон ЕУ да се приклучат нови членки  

„Tоа отсекогаш беше ветување на Европската Унија. Но, можевме да видиме во текот на изминатите години дека тоа ветување не беше исполнето и од двете страни. Значи, го имаме овој моментум за проширувањето и мислам дека мора да го одржиме“, изјави Ропке во интервју за Европската новинска редакција (ЕНР), чија членка е и државната агенција МИА заедно со уште 24 новински агенција од цела Европа.   

Според Ропке, затоа Комитетот става значаен акцент и приоритет на проширувањето, со поттик за активно вклучување на претставници на граѓанското општество од земјите кандидатки во спроведувањето на реформите, што е предуслов за членство врз пристапот базиран на заслуги. 

„Сите го прифаќаат овој пристап. Сега ни треба и силна политичка волја. Го гледам тоа и можам само да кажам дека ЕЕСЦ е апсолутен поддржувач на оваа идеја“, потенцира Ропке. 

За остварувањето на таа цел, според Ропке, ЕЕСЦ ја има Иницијативата на членки од кандидатите за проширување, и повеќе специфични тела, како заедничките консултативни комитети, преку кои се воспоставува структурирана соработка меѓу социјалните партнери, граѓанското општество и владите, како тела за следење на состојбите, но и за формулирање препораки за процесот на проширување.  

„Мислам дека преку нашата работа постигнавме конкретни подобрувања“, додава Ропке. 

Интервјуто во кое Ропке, меѓу другото, говори и за соработката на Комитетот со цивилниот сектор од земјите кандидати за членство, за постигнувањата на ЕЕСЦ и за неговите ставови кон трговската и социјалната политика на ЕУ, МИА во целост ќе го објави утре.