Skip to content
Европскиот совет (ЕС), на состанокот во декември, повторно ќе ја повика Северна Македонија да ја исполни својата обврска и да ги спроведе уставните измени со цел да продолжи процесот на преговори, се вели во нацрт-заклучоците за состојбата на проширувањето, објавија бугарските медиуми повикувајќи се на извори во Брисел.
Во текстот на документот кој ќе биде на дневен ред на ЕС, се забележува дека Советот ја поздравува посветеноста на земјата кон европската интеграција и „ја охрабрува да ги засили своите напори за унапредување на реформите“.
„Советот забележува дека Северна Македонија сè уште не ги завршила уставните измени што ги презела. Советот ја потврдува својата подготвеност да свика нова меѓувладина конференција, без понатамошни одложувања или нови политички одлуки, кога Северна Македонија ќе ја исполни оваа обврска, во согласност со своите внатрешни процедури“, се вели во документот.
Во документот се додава: „Советот е подготвен да го отвори првото преговарачко поглавје што е можно поскоро, во согласност со преговарачката рамка“.
Се очекува земјите-членки на ЕУ едногласно да ги усвојат нацрт-заклучоците на 16 декември во Брисел. Тие се базираат на извештаите на Европската комисија (ЕК) објавени претходно во ноември за напредокот на земјите.
Покрај за Северна Македонија, текстот важи и за другите 5 земји од Западен Балкан (Албанија, Црна Гора, Србија, Косово и Босна и Херцеговина), како и за Украина, Молдавија и Грузија.
Во јуни 2022 година, Северна Македонија го прифати таканаречениот „француски предлог“, кој е одобрен од сите земји-членки на ЕУ. Според Преговорната рамка, за да започнат преговорите меѓу Македонија и ЕУ, Бугарите мора да бидат вклучени во преамбулата на македонскиот устав и во сите негови делови што се однесуваат на заедниците. Северна Македонија мора да се придржува и до Договорот за пријателство, добрососедство и соработка со Бугарија од 2017 година, како и неговите два протоколи.
Во преостанатите заклучоци што се однесуваат на Северна Македонија, според нацрт-документот, Советот ќе ја нагласи потребата од брза и решителна акција за исполнување на критериумите од првиот кластер „Фундаментални вредности“.
Според документот, земјата мора да ги засили своите напори и да спроведе реформи „особено во областа на владеењето на правото“, каде што Европската комисија во својот извештај заклучи дека немало напредок во текот на изминатата година.
„Северна Македонија мора да ја заштити независноста и интегритетот на судството“, се наведува во заклучоците.
Ова вклучува реформи и зајакнување на Судскиот совет во согласност со препораките од 2023 година и мислењето на Венецијанската комисија.
И Европкста Комисија и Европскиот Советот ќе се залагаат за зајакнување на борбата против корупцијата и организираниот криминал, со цел подобрување на резултатите преку ефикасни истраги, пресуди и конфискација на средства во случаи на корупција на високо ниво.
„Советот ја повикува Северна Македонија да усвои нов Кривичен законик, во согласност со правото на ЕУ и меѓународните стандарди“, се вели во нацрт-заклучоците.
Во нацрт-заклучоците, кои треба да се усвојат во декември, се очекува Советот да ја поздрави координацијата на земјата со ЕУ за прашања поврзани со надворешната политика и санкциите.
Во други области, нацрт-заклучокот го забележува напредокот во реформата на јавната администрација, но ја нагласува потребата од продолжување на модернизацијата и обезбедувањето на потребните капацитети.
Дополнително, треба да се упати повик за „понатамошно зајакнување на основните права, вклучувајќи ги правата на малцинствата, слободата на медиумите и слободата на изразување“.
Европскиот совет ќе ја нагласи геостратешката важност на проширувањето на Унијата, но исто така дека напредокот мора да се базира на заслуги и кредибилен процес.
„Советот ги повикува сите партнери да ја искористат можноста, да го искористат моментот и да преземат сите потребни чекори за да го забрзаат својот напредок кон ЕУ. Во сè понестабилен геополитички контекст, со руската агресија врз Украина што се одвива на нашиот континент, ЕУ останува сидро на мирот, просперитетот и безбедноста“, се нагласува во нацрт-заклучоците.
Во исто време, се забележува дека покрај земјите што се стремат кон членство во ЕУ, и самата Унија мора да преземе внатрешни реформи.
Способноста на ЕУ да апсорбира нови членки, а воедно да ја одржува ефикасноста на своето функционирање и развој, е важен фактор во заедничкиот интерес и на Унијата и на кандидатите, се наведува во нацрт-документот што Европскиот совет треба да го усвои на 16 декември.
