„Мегафон“ поднесе претставка против говорот на омраза на премиерот Мицкоски

Неформалната граѓанска иницијатива „Мегафон“ поднесе претставка против говорот на омраза на премиерот Христиина Мицкоски.

Во соопштение до јавноста од „Мегафон“ информираат дека претставката е доставена до Народниот правобранител, а ја известиле и Делегацијата на ЕУ во Скопје.

Во продолжение претставката на „Мегафон“ во целост:

Со оваа претставка Ви се обраќаме како граѓани длабоко загрижени за говорот на омраза и заканувачките пораки кои во последно време ги упатува Претседателот на Владата на Република Северна Македонија, г. Христијан Мицкоски.

Конкретно, во своите јавни настапи, тој ги нарекува медиумските работници, политичките опоненти и сите неистомисленици „талог на општеството“ и притоа најави дека „како Влада сме силно одлучени тој талог да го поразиме“, што создава атмосфера на нетрпеливост, страв и потенцијално насилство врз граѓаните кои критички се изразуваат кон власта. 

Во прилог доказ од обраќање на Претседателот на Влада, Христијан Мицкоски, на форум на повратниците во државата на 24.12.2025.  (https://www.youtube.com/live/MTJZY217kbk?si=qRtO1MERTQs4_jUy).

Ваквите изјави се спротивни на основните демократски принципи, на слободата на говорот и медиумската слобода загарантирани со Уставот на Република Северна Македонија, како и на меѓународните конвенции за заштита на човековите права. 

Истовремено, тие претставуваат форма на психолошко заплашување и поттикнување на нетолеранција, насилство и автоцензура во јавниот простор.

Ве молиме, согласно вашите надлежности, да извршите увид во случајот, да утврдите дали се прекршени правата на граѓаните и новинарите и да укажете на неопходноста од воздржаност на јавните функционери од користење навредлив и заканувачки говор.

Очекуваме Ваш одговор и препораки за преземање на понатамошни мерки во рамки на институционалните механизми за заштита на човековите права и достоинството на сите граѓани.