Удар врз срцето на гасот: нападнато најголемото наоѓалиште во светот

Напад врз најголемото гасно поле во светот – Јужен Парс во Иран – означи нова и опасна фаза во конфликтот на Блискиот Исток, откако беа погодени клучни енергетски постројки во градот Асалујех, на југот на земјата. Станува збор за прв директен удар врз нафтената и гасната инфраструктура од почетокот на војната, што дополнително ја проширува кризата и ја префрла и на енергетски фронт. 

Според извештаите, нападот бил изведен од израелското воздухопловство, а дел од изворите наведуваат дека операцијата била координирана со САД. Цел на нападот било најголемото постројување за преработка на гас во Иран, кое е дел од огромниот енергетски комплекс што го дели со Катар. 

Јужен Парс е најголемото познато гасно поле во светот и претставува клучен извор на енергија не само за Иран, туку и за глобалниот пазар. Полето обезбедува околу 70 проценти од домашното производство на гас во Иран, што значи дека секој удар врз оваа инфраструктура има потенцијал да предизвика пошироки економски последици. 

Иранските власти потврдија дека делови од индустрискиот комплекс биле погодени, но соопштија дека ситуацијата е ставена под контрола. Пожарите што избувнале по нападот биле брзо локализирани, а како превентивна мерка биле исклучени одредени делови од постројките за да се спречи ширење на штетата. Засега нема информации за загинати или повредени. 

Сепак, последиците веќе се чувствуваат. Според извештаите, најмалку две рафинерии престанале со работа, со капацитет од околу 100 милиони кубни метри гас дневно, а Иран привремено ја запрел испораката на гас кон Ирак. 

Нападот предизвика и меѓународни реакции. Катар, кој го дели истото гасно поле со Иран, остро го осуди нападот, предупредувајќи дека таргетирањето на енергетската инфраструктура претставува сериозна закана за глобалната енергетска безбедност и стабилноста на регионот. 

Со овој потег, конфликтот добива нова димензија, бидејќи нападите повеќе не се ограничени само на воени цели, туку директно ја погодуваат и економската и енергетската основа на земјите во регионот, што носи ризик од поширока глобална криза.