Skip to content
Луксузниот рај на Јадранот, црногорскиот Свети Стефан, повторно се враќа на туристичката мапа ова лето, откако пет години беше затворен поради правен и политички спор околу пристапот до плажите, односот меѓу државата и закупците и прашањето кој има право на еден од најпознатите делови од црногорското крајбрежје. Островскиот комплекс Aman Sveti Stefan треба да се отвори за летната сезона на 1 јули 2026 година, додека Villa Miločer ќе прима гости од 22 мај.
Свети Стефан не е обичен хотелски комплекс. Камените куќи со портокалови покриви, тесниот песочен премин кон копното и розовите плажи со децении го создаваа имиџот на место каде Медитеранот личи на филмска сцена. Во минатото тука престојувале светски имиња како Елизабет Тејлор, Мерилин Монро, Софија Лорен и принцезата Маргарет, што дополнително ја зацврсти легендата за островот како јадрански симбол на елитен туризам.
Комплексот беше затворен во 2021 година, откако спорот околу плажите се претвори во поголем конфликт меѓу локалната заедница, закупците и црногорската држава. Главното прашање беше пристапот до обалата, која локалните жители ја доживуваа како јавно добро, додека луксузниот модел на работа го ограничуваше просторот за оние што не се гости на хотелот.
Новиот договор треба да донесе компромис. Плажата Свети Стефан и Краљевата плажа ќе бидат отворени за сите посетители, додека Краљичината плажа ќе остане резервирана за гостите на Aman. Тоа значи дека дел од ексклузивноста останува, но се враќа и јавниот пристап до две од трите плажи во непосредна близина на комплексот.
Црногорската влада го претставува договорот како решение што го штити државниот интерес. Според објавените информации, државата ќе добива 10 проценти од профитот, закупнините ќе бидат зголемени, а новиот аранжман не предвидува дополнителна градба во Милочерскиот парк надвор од постојните дозволи. Закупот треба да биде продолжен за пет години, со обврска комплексот повторно да профункционира оваа сезона.
Aman Sveti Stefan опфаќа 33 куќички и апартмани на самиот остров, сместени во реставрирани камени градби од 15 век, додека Villa Miločer, некогашна летна резиденција на кралицата Марија Караѓорѓевиќ, ќе работи како целогодишна дестинација. Во понудата се и спа-содржини, ресторани, базени, приватни тераси и поглед кон Јадранот, што го враќа комплексот во категоријата на најпрепознатливи луксузни адреси во регионот.
Повторното отворање на Свети Стефан доаѓа во момент кога Црна Гора сака повторно да го зајакне имиџот на елитна туристичка дестинација, но и кога прашањето за јавниот простор, плажите и односот меѓу луксузниот туризам и локалните жители останува чувствително. Затоа ова лето Свети Стефан нема да биде само уште една убава разгледница од Јадранот, туку тест дали најпознатиот црногорски остров може повторно да блесне без да ја отвори старата рана околу пристапот до морето.
