Рубио ја означи Куба како безбедносна закана, Хавана ги отфрли обвинувањата

Американскиот државен секретар Марко Рубио изјави дека Куба претставува закана за националната безбедност на САД и оцени дека шансите за дипломатски договор со актуелната власт во Хавана се мали. Изјавата доаѓа во период на ново заострување на односите меѓу Вашингтон и Хавана, откако САД покренаа обвинение против поранешниот кубански претседател Раул Кастро за соборување на два цивилни авиона во 1996 година.

Рубио рече дека Вашингтон и натаму преферира дипломатско решение, но додаде дека таквата можност не е голема „со оглед на тоа со кого има работа“ американската администрација. Тој порача дека САД не водат политика на „градење држава“, туку реагираат на прашање што го сметаат за директно поврзано со американската национална безбедност.

Според Рубио, Куба со години претставува безбедносен ризик поради нејзините врски со американски противници, меѓу кои Кина и Русија, како и поради односите со режими и групи што Вашингтон ги смета за непријателски во Латинска Америка. Белата куќа претходно оцени дека политиките и активностите на кубанската влада претставуваат „невообичаена и вонредна закана“ за националната безбедност и надворешната политика на САД.

Кубанскиот министер за надворешни работи Бруно Родригез ги отфрли американските обвинувања и го обвини Рубио дека поттикнува воена агресија. Хавана тврди дека Куба не претставува закана за безбедноста на САД и дека американскиот притисок дополнително ја влошува економската и енергетската криза на островот.

Новата ескалација следи и по американските санкции против кубанскиот воено-економски конгломерат ГАЕСА, кој е под контрола на вооружените сили на Куба. Вашингтон тврди дека оваа структура контролира дел од најпрофитабилните сектори во кубанската економија, додека кубанските власти ги отфрлаат обвинувањата и посочуваат на ефектите од долгогодишните американски санкции.

Случајот ја враќа Куба во центарот на американската надворешна политика во Западната хемисфера. Иако Рубио формално зборува за можност за дипломатско решение, тонот на Вашингтон и новите мерки покажуваат дека администрацијата на Доналд Трамп ја засилува линијата на притисок врз Хавана.