Skip to content
Историската градска куќа во францускиот град Лимож, изградена во 19 век, претрпе огромни оштетувања во пожар што избувна за време на насилствата по протестите против високите трошоци за живот во Франција.
Група маскирани лица најпрво запалиле возило на општинската полиција пред зградата, а потоа ги искршиле прозорците, влегле во објектот и подметнале пожар. Огнот брзо се проширил кон покривот, предизвикувајќи уривање на делови од конструкцијата.
Според француските медиуми, пожарот уништил голем дел од зградата, која била свечено отворена во 1883 година и од 1975 година е заштитена како историски споменик.
Пожарникарските екипи со часови се обидувале да го спречат ширењето на огнот, додека стотици граѓани од околните улици го набљудувале пожарот. Во центарот на Лимож биле ограбени и повеќе продавници, а биле регистрирани и судири со полицијата.
Инцидентот е дел од поширокиот бран протести што денеска ја зафати Франција. Стотици илјади граѓани излегоа на улиците поради растечките трошоци за живот, состојбата со јавните услуги и проблемите во образованието.
Иако најголемиот дел од демонстрациите поминале мирно, во Париз, Лион, Марсеј и други градови избувнале судири, биле запалени возила и оштетени јавни објекти.
Француските власти соопштија дека се приведени околу 400 лица. Премиерот Себастијан Лекорни го осуди насилството, нагласувајќи дека политичкото незадоволство не може да биде оправдување за уништување јавен имот.
Пожарот во Лимож претставува и сериозна загуба за француското архитектонско наследство, бидејќи е тешко оштетена зграда стара 143 години.
