Америка ја затвора вратата за патници од ебола-зоните

Америка ја затвора вратата за патници од ебола-зоните откако Центарот за контрола и превенција на болести ги прошири мерките за влез во САД и на лица со постојан престој, ако во последните 21 ден престојувале во Демократска Република Конго, Уганда или Јужен Судан.

Новите правила се поврзани со ширењето на сојот Бундибуџо на ебола, за кој здравствените власти наведуваат дека нема одобрена вакцина или специфичен третман. Претходно, САД веќе го ограничија влезот за странски државјани што престојувале во погодените земји, а сега мерката се проширува и на носители на зелена карта.

Американските државјани и понатаму можат да влезат во земјата, но мора да минат низ засилени здравствени проверки. Според објавените информации, враќањето треба да се одвива преку аеродромот Вашингтон Далес, каде што се спроведуваат дополнителни контроли и следење на патниците.

ЦДЦ наведува дека мерката е привремена и дека е воведена за да се намали ризикот вирусот да биде внесен во САД. Агенцијата истовремено оценува дека непосредниот ризик за американската јавност е низок, но предупредува дека ситуацијата се следи и дека мерките може да се приспособат ако се промени епидемиолошката слика.

Светската здравствена организација го подигна ризикот за ширење на еболата во Конго на многу високо национално ниво. Според последните податоци, се регистрирани стотици сомнителни случаи и десетици потврдени заболувања, додека здравствените служби предупредуваат дека вирусот можеби се ширел со недели пред да биде откриен.

За Вашингтон, ова веќе не е само здравствена тревога во Африка, туку тест за тоа колку далеку може да оди државата кога јавноздравствената заштита ќе се судри со правото на влез и статусот на постојан престој.