Skip to content
Украинската војска повторно може целосно да ги користи сателитските врски „Старлинк“ за своите беспилотни летала и друга опрема, изјави денес нејзиниот министер за одбрана Јевгени Хмара.
Со тоа беа укинати ограничувањата на брзината, за кои украинските власти соопштија дека ги попречиле нивните операции на фронтот повеќе од една недела.
Системите за следење на Министерството за одбрана во Украина пријавија стабилни врски со објекти што се движат побрзо од 400 километри на час, изјави министерот Хмара за новинарите. Ограничувањата воведени минатата недела на StarShield, воената верзија на SpaceX од нејзината сателитска интернет услуга Starlink, која е ‘рбетот на украинските беспилотни летала и комуникациски операции, предизвикаа тревога кај воените и владините претставници, при што командантите пријавија губење на беспилотни летала и прекинување на мисиите.
Продолжувањето на целосната употреба на сателитите Старлик доаѓа во време кога американските претставници започнуваат нови напори за ставање крај на војната.
Во среда, Русија се согласи да ги продолжи преговорите со Вашингтон и Киев следниот месец. Во петок, Киев и Москва се согласија за локализиран прекин на огнот посредуван од првата дама на САД Меланија Трамп, а станува збор за Олешик, град разурнат од војната под руска окупација во јужноукраинската област Херсон.
Прекинот на врските со „Старлинк“ ги зголеми тензиите меѓу Киев и Вашингтон, чии односи се веќе затегнати поради договорот на американскиот претседател Доналд Трамп со Москва во врска со увозот на руски дизел, што Украина го сметаше за предавство.
Хмара рече дека континуираното олеснување на врските е резултат на „директниот дијалог“ и дипломатијата на претседателот Володимир Зеленски со Вашингтон. Тој додаде дека резултатот е „најзначаен за фронтот, за армијата, за работата на беспилотните летала, логистиката и комуникациите“.
Вчера, Зеленски изјави дека Украина сè уште чувствува ограничувања во брзината на „Старлинк“ и „Старшилд“.
Минатата недела се појавија прашања за тоа кој наредил исклучување на сателитскиот систем на Илон Маск, на кој Украина се потпира со години за да се спротивстави на нападите на Москва.
Трамп тврдеше дека тој не го направил повикот и во исто време рече дека Маск не треба да се обвинува за тоа. Американскиот потпретседател Џ.Д. Венс алудираше на координација на Белата куќа со Маск, додека државниот секретар Марко Рубио и министерот за одбрана Пит Хегсет негираа каква било вмешаност на американската администрација.
