Skip to content
По масовниот глобален прекин на централните „клауд“ (cloud) услуги на Microsoft во петокот, експерти во Германија предупредија на ризиците од потпирањето на само еден давател на дигитални услуги.
Тие истакнаа дека многу компании, училишта и владини институции во Германија и во други земји се потпираат на Microsoft за своите компјутерски системи.
Според експертите и индустриските здруженија, таквата зависност претставува ризик, особено по широко распространетиот прекин на неколку услуги понудени од оваа американска корпорација (проблеми кои во меѓувреме се решени).
„Секој што еднострано се става во зависна положба од еден единствен извор за централни дигитални технологии, ризикува прекини во производството и губење на конкурентноста во итни ситуации“, изјави Ралф Винтергерст, претседател на индустриското здружение „Битком“ (Bitkom).
Според податоците на „Битком“, 96% од компаниите во Германија ги набавуваат дигиталните технологии и услуги од странство. Во случај на целосен прекин на услугите, големо мнозинство од нив очекуваат негативни последици врз производството и деловното работење.
Георг Глаше, експерт за дигитален суверенитет од Универзитетот „Фридрих-Александар“ во Ерланген-Нирнберг (FAU), исто така укажува на проблемот со далекусежните општествени последици што можат да настанат како резултат на една техничка грешка кај големите даватели на услуги.
„Колку потесно се поврзани комуникацијата, складирањето податоци и работните процеси, толку потешко станува да се заменат поединечни компоненти или да се префрли користењето на услугите кај друг давател“, изјави Глаше за новинската агенција ДПА (dpa).
Експерти: Треба да се стави крај на централизацијата
Според Кристофер Кунц, експерт за ИТ безбедност, многу комерцијални претпријатија одлучиле целосно да се потпрат на Microsoft за „клауд“ решенија и софтвер за комуникација. „Сепак, тоа не е ниту суверено, ниту отпорно на кризи“, вели овој експерт од стручното списание „Хајзе онлајн“ (Heise Online).
Ризиците за германското општество и економија се значителни, „бидејќи не сме препуштени само на милоста на техничката компетентност на Microsoft, туку и на добрата волја на американската влада“, вели Кунц.
„Преку санкции, таа може за миг да обезбеди поединечни организации, па дури и цели нации, да го изгубат пристапот до ’клауд‘ услугите на Microsoft.“
Консултантот за ИТ безбедност, Мануел Атуг, исто така бара итно да се стави крај на централизацијата околу неколкумина даватели на услуги. Постојат доволно алтернативни даватели од Германија или Европа, истакнува основачот и портпарол на „АГ Критис“ (AG Kritis) – сојуз на независни експерти за критична инфраструктура. Потребни се алтернативи за итни случаи
Иако нема индиции за сајбер-напад во врска со прекинот во работата на Microsoft, Сојузната канцеларија за безбедност на информациите (BSI) нагласува дека, без разлика дали падовите на системите се предизвикани од технички грешки или сајбер-напади, потребни се јасни процедури за да можат процесите да продолжат, а компаниите да останат оперативни.
Според BSI, отпорноста не подразбира само одбивање на заканите, туку и подготовка на алтернативи. Апелот за подобра подготовка за итни случаи го дели и Александар Рабе, извршен директор на Eco, Здружението на интернет-индустријата.
„За ова ни се потребни резервни инфраструктури, доволни капацитети во податочните центри и независни алтернативни решенија“, изјави Рабе.
Во четвртокот, централните услуги од пакетот Microsoft 365 почнаа да откажуваат ширум светот. Покрај сервисот за е-пошта Outlook, ова влијаеше и на програмата за деловна комуникација Teams, услугите за складирање датотеки SharePoint и OneDrive, асистентот со вештачка интелигенција Copilot, како и на административниот портал наменет за ИТ-администраторите.
Кон крајот на август, услугите на Microsoft во облак (cloud) и сервисите за е-пошта, исто така, се соочија со голем прекин што траеше со часови, при што корисниците не можеа да се најават, ниту да испраќаат и примаат пораки.
