Skip to content
Алтернатива за Германија (AfD) веќе не е само протестна партија од политичката периферија. Во најновиот ARD DeutschlandTrend партијата има 27 проценти поддршка и е пред CDU/CSU, која е на 20 проценти. Во центарот на нејзиниот подем е Алис Вајдел. Таа е економистка со меѓународна кариера и приватен живот кој на прв поглед тешко се вклопува во дел од политиките што ги застапува нејзината партија.
Нејзиниот приватен живот создава необичен контраст со дел од програмата на AfD. Вајдел живее со жена со потекло од Шри Ланка и заедно одгледуваат два сина. Тоа е политички релевантно единствено затоа што нејзината партија го промовира традиционалното семејство составено од „татко, мајка и деца“ како општествен модел и остро се спротивставува на дел од политиките поврзани со родот и семејството.
Контраст има и во друга област. Партнерката на Вајдел има мигрантско потекло, а самата Вајдел значителен дел од животот поминала во странство. Политички, сепак, таа е едно од главните лица на исклучително рестриктивната имиграциска политика на AfD. Партијата бара значително ограничување на миграцијата и азилот и промовира концепт на „ремиграција“ за дел од странските државјани кои живеат во Германија.
Самата Вајдел не го избегнува ова прашање. Кога годинава беше соочена со ставот од програмата на AfD во Саксонија-Анхалт дека семејството со мајка и татко создава најдобри услови за развој на децата, нејзиниот одговор беше: „Јас живеам нешто друго“. Таа рече дека нејзините деца имаат најдобри услови и дека истополовите врски треба да бидат еднакво третирани, но истовремено го бранеше правото на партијата да го промовира традиционалното семејство како идеал.
Вајдел е родена во 1979 година во западна Германија. Студирала економија и бизнис-администрација, докторирала економија, работела во финансискиот сектор, меѓу другото и за Goldman Sachs, а неколку години поминала во Кина. Зборува мандарински, а пред целосно да влезе во политиката имала кариера која повеќе наликува на биографија на меѓународен финансиски експерт отколку на иден лидер на германската радикална десница.
Во AfD влегла во 2013 година, во период кога партијата главно се профилирала преку евроскептицизмот. Со нејзиното поместување надесно растела и политичката кариера на Вајдел. Во 2017 година станала пратеничка и една од водечките фигури на парламентарната група, од 2022 година е копретседателка на партијата, а на изборите во 2025 година беше нејзина кандидатка за канцелар.
Токму Вајдел ѝ помогна на AfD да добие поинакво јавно лице. Наместо реториката да ја носи исклучиво профилот на традиционалната германска крајна десница, пред камерите стои економистка со корпоративно искуство, меѓународна биографија и мирен, често технократски начин на настап. Тоа не значи дека политиката што ја застапува е поумерена, туку дека начинот на кој ја претставува е поинаков. Reuters забележува дека нејзиниот профил ѝ помага на AfD да се претстави пред поширок круг гласачи.
Зад тој имиџ стојат цврсти позиции: силно ограничување на имиграцијата, поинаква политика кон азилот, враќање на нуклеарната енергија, укинување на санкциите кон Русија и радикална промена на функционирањето на Европската Унија. Вајдел, значи, не е умереното крило што ја менува AfD одвнатре. Таа е лицето со кое AfD се обидува своите радикални позиции да ги претстави како политика способна да управува со Германија.
А, резултатот засега се гледа во анкетите. Со 27 проценти во DeutschlandTrend, AfD е пред сите други германски партии. Големите партии сè уште ја отфрлаат коалициската соработка со неа, но политичката изолација станува сè потешка тема кога партијата има поддршка од повеќе од четвртина од гласачите.
Алис Вајдел затоа е интересна не само поради противречностите меѓу нејзиниот живот и дел од програмата на AfD. Поважно е што токму нејзината нетипична биографија ѝ помогна на партијата која некогаш беше на германската политичка маргина да се претстави како претендент за власта.
