Skip to content
Русија денеска го одржува вториот ден од тридневните парламентарни избори, а за првпат по анексијата во 2022 година Москва во изборите за Државната дума ги вклучи и окупираните делови од украинските региони Доњецк, Луганск, Запорожје и Херсон. Анексијата не е меѓународно призната, а Европската Унија однапред соопшти дека нема да ги признае изборите одржани на украинска територија.
Гласањето започна на 18 септември и ќе трае до недела, 20 септември. Русите избираат 450 пратеници во Државната дума, а паралелно во повеќе региони се одржуваат избори за гувернери и регионални парламенти. Ова се првите руски парламентарни избори од почетокот на целосната инвазија врз Украина во февруари 2022 година.
Москва формално ги прогласи Доњецк, Луганск, Запорожје и Херсон за дел од Руската Федерација во септември 2022 година, по референдуми одржани во услови на воена окупација. Русија, сепак, ниту денес не ги контролира целосно териториите на сите четири региони.
Гласање се организира и на Крим, кој Русија го анектираше во 2014 година. Киев ги смета изборите на окупираните територии за незаконски и ги повика другите држави да не ги признаваат нивните резултати. ЕУ исто така соопшти дека изборите организирани од Москва на украинска територија немаат правно дејство и претставуваат повреда на суверенитетот и територијалниот интегритет на Украина.
Според АП, гласањето во дел од окупираните области започнало порано поради безбедносната состојба. Украинските власти и организации за човекови права тврдат дека во некои места жители биле изложени на притисок да гласаат, вклучително и преку закани поврзани со социјални права и работни места во јавниот сектор. Москва не ги прифаќа ваквите оценки и изборите ги третира како дел од редовниот руски изборен процес.
Изборите се одржуваат во политички амбиент во кој просторот за организирана опозиција е значително ограничен. Reuters наведува дека најголемиот дел од антивоените кандидати не успеале да влезат во изборната трка, додека владејачката „Единствена Русија“ влегува во изборите со сегашно двотретинско мнозинство во Думата.
Претседателот Владимир Путин изборите ги претставува како демонстрација на национално единство во услови на војната, додека критичарите на Кремљ оценуваат дека политичкиот систем остава мал простор за вистинска изборна конкуренција. Сам Путин гласаше електронски.
Изборниот процес се одвива и под силни безбедносни мерки. Во последните денови имаше украински напади со дронови и други инциденти во делови од Русија и на окупираните територии, а Путин ја обвини Украина дека се обидува да го попречи гласањето. Киев ги отфрла руските избори на окупираната украинска територија како нелегитимни.
Првичните резултати од изборите за Државната дума се очекуваат по затворањето на гласачките места во недела навечер, додека покомплетна слика за составот на новиот парламент се очекува во понеделник.
