Skip to content
Тринаесетгодишен ученик во Рим нападнал наставничка со нож откако претходно ја испрскал со иритантен спреј, а целиот напад планирал да го сними со камера поставена на кацига и да го пренесува преку интернет. Наставничката е повредена, но не е во животна опасност.
Инцидентот се случил во петокот наутро во училиштето „Џовани Верга“ во римската населба Ченточеле. Според италијанската агенција ANSA, момчето влегло во училиштето со два ножа со сечила долги околу 20 сантиметри, иритантен спреј и кацига на која била поставена камера.
По влегувањето во училницата, прво ја испрскал 66-годишната наставничка Изабела Марсилио во лицето, а потоа ја нападнал со нож. Според нејзиното сведоштво, била погодена трипати во пределот на слабината. Ниту еден од ударите не зафатил витален орган.
Нападот го запрел друг ученик, кој интервенирал и го спречил тринаесетгодишникот да продолжи. По повикот на бројот за итни случаи во училиштето пристигнале карабинерите и медицински екипи.
Првичните информации дека нападот бил директно пренесуван во живо подоцна беа прецизирани. Истражителите утврдуваат дали ученикот успеал да започне пренос или само се обидувал да го направи тоа. Неговиот телефон бил поврзан со Telegram, а според ANSA, тој се обидувал нападот да го сними преку видеоповик во живо.
Полицијата го одзела телефонот за да утврди со кого комуницирал и дали други лица знаеле што планира. Се проверуваат и информации дека во комуникацијата можеби учествувале други малолетници или возрасни.
Како можен мотив се истражува лоша оценка од претходната учебна година. Наставничката потврдила дека ученикот имал неположена обврска по нејзиниот предмет, но истражителите сè уште не утврдиле дали тоа било директната причина за нападот.
Марсилио, која предава италијански јазик, историја и географија и е во последната година пред пензионирање, по лекарската помош била пуштена дома. Таа за италијанските медиуми изјавила дека е потресена од слученото.
Тринаесетгодишникот бил однесен во полициска станица заедно со родителите. Бидејќи во Италија кривичната одговорност започнува од 14-годишна возраст, случајот ќе се разгледува и низ системот за заштита на малолетници, додека истрагата треба да утврди како дошол до оружјето и дали нападот бил однапред подготвен.
Италијанските истражители проверуваат и дали идејата за снимање на насилството е поврзана со онлајн групи или со имитирање содржини што кружат на социјалните мрежи. Засега нема потврда дека нападот бил дел од организиран интернет-предизвик.
