Трамп призна дека сам се шминка за да не изгледа „како мртовец“

Американскиот претседател Доналд Трамп призна дека редовно користи шминка и дека самиот ја нанесува на лицето за да не изгледа „како мртовец“. Необичното признание го даде за време на предизборен собир на Републиканската партија во Џорџија, додека го исмеваше демократскиот сенатор Џон Ософ поради неговиот изглед и трошоците за шминка.

„Користам малку шминка и сам ја нанесувам. Ако не ставите барем малку, изгледате како мртовец. А јас не сакам така да изгледам“, изјави 80-годишниот американски претседател пред своите поддржувачи.

Изјавата беше дадена во петокот, 16 октомври, на предизборен собир во градот Далтон, во американската сојузна држава Џорџија, во рамките на кампањата за изборите за Конгресот што ќе се одржат во ноември.

Трамп зборуваше за изгледот на демократскиот сенатор Џон Ософ, обвинувајќи го дека троши големи суми пари на професионално шминкање.

„Џон Ософ потрошил повеќе пари на шминка од кој било маж или жена во историјата на Сенатот. Жените не се задоволни од тоа. Потрошил цело богатство“, рече Трамп, без да понуди докази за своето тврдење.

Американскиот претседател го исмеваше изгледот на Ософ, споредувајќи го со комичниот телевизиски лик Пи-ви Херман, а потоа ја искористи темата за да проговори за сопствените навики.

Трамп нагласи дека, за разлика од сенаторот, користи многу малку козметика и дека не ангажира професионален шминкер за секојдневното шминкање.

Изгледот на американскиот претседател со години привлекува медиумско внимание, особено поради препознатливиот портокалов тен и употребата на козметички производи.

Претходно, Трамп потврди дека користи шминка и за прикривање на модринките на рацете, кои во повеќе наврати беа забележани на фотографии од неговите јавни настапи.

Признанието за шминкањето доаѓа во период кога Трамп е активно вклучен во кампањата за конгресните избори, настојувајќи да ја зајакне поддршката за републиканските кандидати.