Skip to content
Светската здравствена организација (СЗО) испитува можно ретко пренесување на хантавирус меѓу луѓе на крузерот „Хондиус“, каде се регистрирани најмалку седум случаи и три смртни исходи, додека бродот е задржан крај брегот на Зеленортските Острови и патниците се во изолација.
Според информациите, станува збор за невообичаена ситуација, бидејќи хантавирусот најчесто се пренесува преку контакт со заразени глодари, но во овој случај се разгледува можноста за ограничен пренос меѓу блиски контакти, како лица кои делеле кабини.
Крузерот, кој пловел од Аргентина кон Атлантикот со околу 150 патници, е ставен под здравствен надзор откако повеќе лица покажале симптоми на сериозна респираторна инфекција, а дел од нив биле евакуирани во болници.
СЗО посочува дека постои сомнеж оти инфекцијата потекнува од Јужна Америка, каде циркулира таканаречениот „андски“ сој на вирусот – редок тип кој може да се пренесува од човек на човек во одредени услови.
И покрај сериозноста на случајот, здравствените власти нагласуваат дека ризикот за пошироката јавност останува низок, додека истрагата за начинот на ширење на вирусот и понатаму е во тек.
Патниците на бродот се задржани во кабини, а локалните власти не дозволуваат искрцување сѐ додека не се утврдат сите околности и не се спроведат дополнителни здравствени мерки.