Макрон ја одби оставката на премиерот Атал, ќе остане привремено на чело на владата

Францускиот претседател Емануел Макрон ја одби оставката на премиерот на земјата, барајќи денес од него привремено да остане на чело на владата, откако хаотичните изборни резултати ја оставија владата во неизвесност.

Француските гласачи го поделија законодавниот дом на левицата, центарот и крајната десница, не оставајќи ниту една фракција ни приближно до мнозинството потребно за формирање влада. Резултатите од гласањето во неделата го зголемија ризикот од парализа за втората по големина економија на Европската унија.

Претседателот Емануел Макрон се коцкаше дека неговата одлука да распише предвремени избори ќе ѝ даде на Франција „момент на разјаснување“, но исходот го покажа спротивното, на помалку од три недели пред почетокот на Олимпијадата во Париз.

Главниот индекс на акции на Франција се отвори со пад, но брзо закрепна, веројатно затоа што пазарите стравуваа од целосна победа на крајната десница или левичарската коалиција.

Премиерот Габриел Атал рече дека ќе остане на функцијата доколку биде потребно, но ја понуди својата оставка денес наутро. Макрон, кој го именуваше пред само седум месеци, веднаш побара од него да остане „за да се обезбеди стабилност на земјата“.

Атал во неделата јасно стави до знаење дека не се согласува со одлуката на Макрон да распише ненадејни избори. Резултатите од двата круга на гласање не оставија очигледен пат за формирање влада ниту за левичарската коалиција која беше прва, за центристичката алијанса на Макрон или за крајната десница.