Skip to content
Ерменија се најде под нов притисок од Москва, откако рускиот претседател Владимир Путин предупреди дека приближувањето кон Европската Унија може да ја чини земјата трговски, енергетски и економски повластувања во рамките на Евроазиската економска унија, во момент кога Ереван сè поотворено се оддалечува од руската орбита.
Путин, по самитот на Евроазиската економска унија во Астана, порача дека истовремено движење кон ЕУ и останување во руско-водениот економски блок е практично невозможно. Според него, ако Ерменија ги прифати европските економски стандарди, ќе мора да се преиспитаат интеграциските процеси што ја поврзуваат со Русија и другите членки на ЕАЕУ.
Москва предупредува дека Ереван може да изгуби пристап до договорите за слободна трговија, поволните услови за енергенси и дел од економските механизми што сега ги користи како членка на Евроазиската економска унија. Русија веќе претходно сигнализираше дека може да ги преиспита евтините испораки на гас, нафта и други стратешки суровини ако Ерменија продолжи по европскиот пат.
Притисокот доаѓа во чувствителен момент за премиерот Никол Пашинјан, чија влада ги продлабочува врските со ЕУ и САД, а истовремено ги замрзна односите со Организацијата на Договорот за колективна безбедност, воениот блок предводен од Москва. Односите меѓу двете земји се влошија по 2023 година, кога Ерменија ја обвини Русија дека не ја заштитила за време на кризата околу Нагорно-Карабах.
Руско-водениот економски блок побара Ерменија да распише референдум за да избере меѓу европска интеграција и останување во ЕАЕУ. Пашинјан, според меѓународните извори, го одбива тој притисок и тврди дека реформите кон ЕУ не мора автоматски да значат прекин со постојните економски врски.
Сепак, Москва ја засили пораката и со дипломатски чекор. Русија го повика својот амбасадор во Ереван, Сергеј Копиркин, на консултации, што се чита како јасен знак на незадоволство од ерменското приближување кон Западот.
Ерменија така станува ново поле на судир меѓу Русија и Западот. За Москва, европскиот курс на Ереван е удар врз последните канали на руско влијание во Јужен Кавказ. За Пашинјан, пак, приближувањето кон ЕУ е обид да се излезе од зависноста од сојузник што, според ерменската власт, не ја исполнил безбедносната улога во најтешкиот момент.
