Skip to content
Најбогатата земја во светот, Луксембург, од 1 јуни ги зголемува платите и пензиите за 2,5 проценти, како дел од автоматскиот систем на индексација со кој примањата се усогласуваат со растот на трошоците за живот, а минималната плата за работници без диплома се приближува до 2.800 евра месечно.
Зголемувањето се однесува на сите плати, пензии и јавни примања во земјата. Луксембург го применува системот на автоматска индексација, што значи дека кога инфлацијата ќе достигне одреден праг, примањата се зголемуваат за да се заштити куповната моќ на граѓаните.
Со новото усогласување, минималната бруто-плата за неквалификувани работници се зголемува од 2.703,74 евра на околу 2.771 евро месечно. За квалификуваните работници минималната плата се искачува над 3.300 евра, што уште еднаш ја потврдува разликата меѓу Луксембург и поголемиот дел од Европа.
Оваа земја со години е на врвот според висината на минималната плата во Европската Унија. Додека во дел од европските држави минималецот едвај ја покрива основната потрошувачка, во Луксембург дури и најниската законска плата изгледа недостижно за многу работници од регионот.
Сепак, високите плати не значат автоматски лесен живот. Луксембург е и една од најскапите земји за живеење, со високи трошоци за домување, услуги и секојдневна потрошувачка. Токму затоа индексацијата не се претставува како бонус, туку како механизам за одржување на реалната вредност на приходите.
Одлуката доаѓа во време кога инфлацијата и цените на енергијата продолжуваат да влијаат врз домашните буџети низ Европа. Луксембург, за разлика од многу други земји, има вграден систем што автоматски реагира кога трошоците растат, па товарот не останува целосно врз работниците и пензионерите.
За граѓаните од регионот, бројката од речиси 2.800 евра минимална плата звучи како економска фантазија. За Луксембург, пак, тоа е дел од моделот со кој најбогатата земја се обидува да ја задржи рамнотежата меѓу високите приходи и уште повисоките трошоци за живот.
