СДСМ: Ново пукање, Тошковски е закана за безбедноста

Синоќа се случи уште едно во низата пукања, овој пат во Арачиново, има и тешко повредени. Со Тошковски на чело на МВР и ДПМНЕ во власта улиците станаа небезбедни, се пука на секој чекор. Криминалците напаѓаат по улиците затоа што немаат страв од Тошковски, се истакнува во соопштението на опозициската СДСМ.

Од СДСМ наведуваат деја „пред една недела имаше пукање со убиство кај Мавровка, пред тоа во Синѓелиќ, во Чаир, Батинци, Тетово, на Пластичарска улица…, и дека нема ниту трага ниту глас од сторителите. Од 8 убиства и обиди за убиства досега Тошковски има едвај едно расчистено“.

„Тошковски нема контрола ниту над северната граница која е предадена на приватно управување на ВЛЕН. Таму не се знае што се случува и како се поминува. Криминалците бегаат од затворите а Тошковски не може да ги лоцира“ нагласуваат од СДСМ.

Опозициската партија прашува дали Мицкоски ќе побара одоговрност од Тошковски или ќе го брани и понатаму.

„Досега немало понеспособен министер за внатрешни работи и Тошковски после сите скандали треба да си поднесе оставка“, се истакнува во соопштението на опозициската СДСМ.