Унгарија се повлекува од Меѓународниот кривичен суд: Му дадоа поддршка на Израел

Унгарија објави дека се повлекува од Меѓународниот кривичен суд (МКС), чие седиште е во Хаг.

Шефот на кабинетот на премиерот Виктор Орбан, Ѓерѓи Гулаш, го објави овој необичен потег неколку часа откако израелскиот лидер Бенјамин Нетанјаху, по кого МКС издаде налог за апсење, пристигна во Унгарија во државна посета.

Штом беше издаден налогот за апсење во ноември минатата година, Орбан го покани израелскиот премиер да ја посети, велејќи дека „тоа нема да има ефект“ во неговата земја.

Судиите на МКС тогаш објавија дека има „разумна основа“ Нетанјаху да сноси кривична одговорност за наводните воени злосторства и злосторства против човештвото во војната меѓу Израел и Хамас во Појасот Газа. Нетанјаху ги отфрли обвинувањата како антисемитизам.

Инаку, Унгарија е една од земјите основачи на Меѓународниот кривичен суд во кој членуваат 125 земји.

Од друга страна, САД, Русија и Кина, меѓу големите сили, не ја признаваат надлежноста на овој суд.

МКС може да им суди на обвинетите за геноцид, злосторства против човештвото и воени злосторства на териториите на земјите-членки според Римскиот статут.

Израел ја отфрли јурисдикцијата на МКС, но судот во 2021 година пресуди дека има јурисдикција над окупираниот Западен Брег, Источен Ерусалим и Газа бидејќи генералниот секретар на ОН ја прифати Палестина како членка.