25 пријави за кардиологија — Клековски: Квалитетот е поважен од брзината

Во Фондот за здравствено осигурување (ФЗО) пристигнале уште 15 претставки за сомнителни кардиохируршки интервенции, од кои пет се индивидуални, а десет поднесени од здравствена установа. Генералниот директор на ФЗО, Сашо Клековски, денеска соопшти дека претставките се проследени до Министерството за здравство за понатамошно постапување и дека, вкупно, „досега се примени 25 претставки од пациенти за сомнителни кардиолошки интервенции“. Според него, пријавите опфаќаат различни временски периоди, а „најстарата се однесува на настан од 2010 година“. Претставките стигнуваат по аферата која ја обелодени Д-р Кедев дека се правеле непотребни операции само за да се направи профит на дел од клиниките во Македонија.

„Во основа се издвојуваат три категории претставки,“ рече Клековски, објаснувајќи: „Прво, случаи каде е направена интервенција, а можеби немало потреба; второ, случаи каде требало да се направи интервенција, а не е направено тоа што требало; и трето, интервенции кај пациенти во терминална фаза, кај кои постапката не води кон подобрување или продолжување на животот.“ Тој направи споредба со онкологијата: „Тоа е како давање скапи онколошки лекови на терминално болни, кога е потребна палијативна нега. Не е едноставна одлука, но мора да биде донесена.“

Клековски апелираше до медиумите и јавноста „да не очекуваат брзи резултати — и не е пожелно да има брзи резултати, бидејќи тие би биле погрешни.“ „Мора да влеземе длабоко во процесот, ова мора да биде процес на учење — каде сме грешеле и што треба да промениме за вакви случаи да не се повторуваат. Брзината е помалку важна од квалитетот на сработеното,“ нагласи тој, додавајќи дека доколку се утврдат сериозни грешки, „треба да заврши со кривични пријави — процес на барање и преземање одговорност.“

Според директорот на ФЗО, искуството од истрагата за Онкологија покажало дека е потребно време: „Домашните лекари ги лoцираа можните случаи, тие беа испратени во странство на мислење, и таа постапка трае. Но мора да сме сигурни во она по што ќе постапиме.“ Во истиот тон, тој најави и системски зафат: „Здравствените власти треба да извлечат поука како да го смениме системот — од контрола на квантитет кон контрола на квалитет на сработеното.“

На новинарско прашање за одговорност, Клековски беше експлицитен: „Индивидуалната одговорност мора да се санкционира, бидејќи грешките се индивидуални — тоа е поука и сигнал дека ќе има одговорност.“ Тој потсети дека „надвор од гонење за 100 евра мито немаме ниеден сериозен случај во здравството, а има сериозни случаи.“ Затоа, според него, случајот Онкологија е „стратешки важен да биде изведен до крај со правосилност — без оглед на исходот“ и „и овој случај мора да биде изведен до крај.“

Клековски ги даде изјавите по прес-конференција за активностите на ФЗО за зголемување на бројот на матични лекари во руралните средини, нагласувајќи дека паралелно со кадровските политики, институциите мора да изградат механизми за оценка на медицинската оправданост на скапите и ризични интервенции во кардиологијата и кардиохирургијата. „Целта е доверба — доверба дека секоја интервенција има јасна клиничка цел и мерлив бенефит за пациентот,“ рече тој.