Skip to content
Германска индустрија повторно влегува во зона на ризик откако војната на Блискиот Исток го засили притисокот врз енергетските пазари, а германското хемиско лоби ВЦИ предупреди дека евентуални подолготрајни нарушувања поради затворањето на Ормутскиот Теснец би можеле да донесат нов инфлаторен бран, дополнително да ги вознемират пазарите и да ги продлабочат проблемите со кои секторот веќе се соочува со години. Здружението, кое претставува околу 2.300 компании, не даде ни прогноза за 2026 година, оценувајќи дека војната против Иран создава премногу неизвесност за каква било посигурна пресметка.
Предупредувањето доаѓа во време кога германската економија и без тоа се движи кревко. Институтот ДИВ процени дека поскапувањето на енергенсите поради војната ќе го забави закрепнувањето, иако засега не очекува драматичен удар врз растот, додека Ифо и други германски институти наведоа дека годинава економијата би можела да порасне околу 0,8 проценти, под услов нафтата и гасот да не останат долго на високи нивоа. Ако ценовниот шок потрае, растот би бил уште послаб, а инфлацијата би се приближила до 3 проценти.
Најголемиот страв е врзан за Ормутскиот Теснец, низ кој минува околу една петтина од светската нафта. Меѓународната агенција за енергија соопшти дека светот се соочува со најголемото нарушување на нафтеното снабдување во историјата, со очекуван пад од 8 милиони барели дневно во март, додека дополнителен притисок создава и наглиот раст на цените на дизелот, клучен за транспортот, земјоделството и индустријата. Во таков амбиент, германската индустрија не стравува само од поскапа енергија, туку и од нов удар врз конкурентноста во момент кога закрепнувањето штотуку почна да се наѕира.