Skip to content
Утковски поднел оставка од функцијата директор на КПУ Затвор „Скопје“ во Шуто Оризари, повикувајќи се на лични причини. Оставката на Бобан Утковски е доставена до Владата и треба да биде разгледана на некоја од следните владини седници.
Информацијата ја објави „Слободен печат“, откако редакцијата испратила прашање до Владата и добила официјална потврда дека директорот побарал да се повлече.
Од Владата соопштиле дека во оставката како образложение се наведени лични причини. Јавноста ќе биде информирана откако ќе биде именуван нов директор на затворот.
Засега не се објавени дополнителни информации за причините поради кои Утковски решил да ја напушти функцијата. „Слободен печат“ се обидел да стапи во контакт со него, но тој не одговорил на телефонските повици и на испратените пораки.
Директорот на Управата за извршување санкции, Александар Пандов, изјавил дека во изминатите месеци немал контакт со Утковски, иако тој беше именуван за директор на затворот по негов предлог.
Утковски го привлече вниманието на јавноста со изјавата за безбедносните услови во затворот, дадена во контекст на постапката против поранешниот вицепремиер Артан Груби. Тој тогаш тврдеше дека затворот во Шуто Оризари не е „мексикански картел“ и дека безбедноста на затворениците е приоритет.
