Skip to content
Политиката кон Вучиќ и Србија мора да се смени од темел по погребот на правосилно осудениот за геноцид Ратко Младиќ, порача хрватскиот европратеник и известувач на Европскиот парламент за Србија, Тонино Пицула. Тој оцени дека Европската Унија предолго му попуштала на режимот во Белград и дека сега мора да премине од изразување загриженост кон конкретни мерки.
Според Пицула, погребот на Младиќ треба да биде пресвртница во односот на Брисел кон српскиот претседател Александар Вучиќ, особено за Европската комисија и влијателните земји членки кои досега воделе попустлива политика кон Белград.
Тој нагласи дека Србија сама го избира својот пат, но доколку сака членство во Европската Унија, мора да го отфрли историскиот ревизионизам и величењето на лица осудени за воени злосторства и геноцид.
Погребот на Младиќ, според Пицула, не е единствената причина за промена на европската политика. Тој ги посочи посетата на Вучиќ на воената парада во Москва, случајот Бањска на северот на Косово, законите за кои тврди дека ја нарушуваат независноста на обвинителството и кршењето на демократските стандарди по трагедијата во Нови Сад.
Пратеници од четири големи политички групи во Европскиот парламент испратиле писмо до еврокомесарката за проширување Марта Кос и побарале реакција од Европската комисија. Истовремено, според хрватските медиуми, се зголемува бројот на европратеници кои бараат замрзнување или суспендирање на пристапниот процес на Србија.
Пицула порача дека европските лидери треба да преминат од фаза на шок во фаза на реакција. Според него, Вучиќ повеќе не треба да има политички имунитет од санкции, а српската власт не може да остане повластен и недопирлив партнер на Брисел на Западен Балкан.
Тој оцени дека просторот за дипломатија се стеснува, бидејќи Вучиќ во изминатите 12 години не ги реализирал ветувањата поврзани со демократизацијата и европската интеграција на Србија.
Пицула предупреди и дека случувањата во Белград ќе влијаат врз поширокиот регион. Министерот за надворешни работи на Босна и Херцеговина, Елмедин Конаковиќ, одлучи да повлече речиси цел дипломатски персонал од Белград, додека претставници на политичкиот врв на Република Српска присуствуваа на погребот на Младиќ.
