Skip to content
Руски воен сателит изведе екстремно блиско маневарот до комерцијален сателит што обезбедува радарски снимки за Украина, што западните експерти го оценија како вежба за напад во орбитата. Уште две руски летала веќе се движат кон траекторијата на втор западен сателит.
Рускиот воен сателит „Космос 2612“ кон средината на октомври намерно се приближи на помалку од еден километар, а според одредени проценки и на само неколку стотини метри до сателитот „Икс-36“, сопственост на финската компанија „Ајсај“ (ICEYE). Овој комерцијален сателит обезбедува радарски снимки со висока резолуција за западните армии и за одбранбените потреби на Украина.
Помошникот државен секретар на САД, Томас Динано, по инцидентот изјави дека рускиот сателит намерно маневрирал опасно блиску до комерцијалниот објект и оти таквото однесување одговара на операции со вселенско оружје во орбитата.
Вселенските аналитичари го оценија настанот како едно од најблиските познати приближувања на руски воен апарат до цивилен сателит во ниската Земјина орбита. Грег Гилингер, поранешен разузнавач на американското воено воздухопловство и виш аналитичар во компанијата „Интегрити ИСР“, изјави дека станува збор за најагресивен потег на Москва досега и оти маневарот наликува на тестирање капацитети за директен кинетички напад.
Руското Министерство за одбрана не одговори на барањата за коментар, но официјална Москва претходно во повеќе наврати предупреди дека комерцијалните западни сателити што помагаат во украинските воени операции може да станат легитимни цели за одмазднички удари.
По опасниот контакт, „Космос 2612“ се оддалечил на околу 400 километри, но американските системи за следење регистрираа дека два други руски сателити од истата група сега се насочени кон орбиталната патека на друг сателит на истата компанија, „Икс-37“. Двата западни апарати се регистрирани во САД.
Командантот на вселенските сили на Германија, генерал-мајор Михаел Траут, истакна дека ваквите маневри можат да послужат за инспекција, набљудување или попречување, предупредувајќи дека ризикот се движи од привремено блокирање на сигналот до трајно уништување на сателитот во орбитата.
