Филипче најавува дека ќе чешла од А до Ш во новата Влада

Претседателот на СДСМ, Венко Филипче, најавува дека доколку партијата повторно дојде на власт, ќе отвори ревизија на договори, трансакции, кредити, лиценци и медиумски врски за кои опозицијата тврди дека се поврзани со политичко-финансиски интереси меѓу Македонија, Србија и Унгарија.

Во интервју за српскиот медиум Nova.rs, Филипче зборува за, како што вели, политичко-финансиска мрежа што ги поврзува Виктор Орбан, Александар Вучиќ и Христијан Мицкоски. Тој тврди дека во таа мрежа важна улога имаат медиуми, енергетски компании, банкарски врски, унгарскиот кредит и најавите за нови телекомуникациски аранжмани.

Филипче најавува дека, ако СДСМ формира влада, меѓу првите чекори ќе бидат ревизија на спорните аранжмани и закон за нулта толеранција кон криминалот и корупцијата. Според неговата изјава, предмет на проверка би биле сите сомнителни трансакции, кредити, лиценци и медиумски врски.

Тој посебно ги споменува Алта банка, унгарските кредити и телекомуникациските лиценци, за кои вели дека треба да бидат предмет на детална проверка. Во интервјуто Филипче се повикува и на претходни извештаи и истражувања за унгарско влијание врз медиумскиот простор во регионот, како и на сомнежи за финансиски текови преку маркетинг-кампањи и медиумски структури.

Во делот за унгарскиот кредит, Филипче тврди дека договорот од една милијарда евра мора да биде преиспитан, особено поради прашањата за потеклото на средствата, трошоците, провизиите и условите под кои парите биле обезбедени и пласирани. Тој бара истраги и за можни поврзаности со кинески финансиски институции и унгарски посреднички структури.

Најавата доаѓа паралелно со промоцијата на „Фронтот за вистина и правда“, политичка платформа на СДСМ во која, според Филипче, централно место има борбата против корупцијата. Програмата се темели на четири столба: нулта толеранција за корупција и европска правда, иднина за младите, подобар животен стандард и силно село и земјоделци.

Како дел од новиот антикорупциски пристап, СДСМ најавува целосна дигитализација на постапките, проверка на имотните листови, јавни регистри, заштита за пријавувачи на корупција и можност за награда за лица што ќе помогнат во враќање незаконски стекнати јавни средства.