Skip to content
Софија не попушта во спорот со Македонија за европскиот пат, откако бугарската министерка за надворешни работи Велислава Петрова порача дека Скопје треба да се фокусира на исполнување на преземените обврски кон ЕУ, а не на барање конфликт со Бугарија.
Петрова во изјава за БНТ повтори дека за Софија прашањето повеќе не е билатерален спор, туку однос меѓу земја кандидат и Европската Унија. Според неа, договореното во 2022 година останува европска позиција и Бугарија нема намера да отстапи од рамката што го отвори патот на Македонија кон преговорите со ЕУ, но истовремено го врза напредокот со уставните измени.
Бугарската министерка рече дека тонот од Софија е „исклучително позитивен“, но дека од Скопје често не гледа политичка зрелост. Таа нагласи дека Македонија треба да го искористи сегашниот „отворен прозорец“ за проширување, во момент кога Црна Гора и Албанија напредуваат побрзо во европскиот процес.
Таквата порака не доаѓа изолирано. Бугарското Министерство за надворешни работи и претходно, по средбата на Петрова со македонскиот министер Тимчо Муцунски во Шведска, соопшти дека целосното исполнување на преземените обврски во рамките на европскиот консензус од јули 2022 година е единствена гаранција за устойчив напредок на Македонија кон ЕУ.
Во истата линија, бугарските медиуми ја пренесуваат и пораката дека гарантирањето на правата на македонските Бугари останува приоритет за Софија. Тоа практично значи дека бугарската страна го задржува фокусот врз уставните измени и не покажува подготвеност за отворање нова политичка рамка.
Од македонска страна, пак, премиерот Христијан Мицкоски повторува дека нема да има отстапки за македонскиот идентитет и дека Владата нема да го смени ставот „преку ноќ“ без исполнување на предусловите што ги очекува. Муцунски, по претходната средба со Петрова, нагласи дека прашања поврзани со македонскиот јазик, идентитет, култура и историја не може да бидат предмет на дискусија.
Така, двете страни повторно стојат на спротивни позиции. Софија инсистира дека договореното во 2022 година е европска обврска, а Скопје тврди дека условувањето има билатерална природа и дека не смее да ја допре идентитетската основа на државата.
Во пресрет на посетата на претседателот на Европскиот совет Антонио Кошта на Македонија, оваа размена на пораки ја враќа старата дилема во нов момент: дали Брисел може да најде формула што ќе го одблокира процесот, или Македонија повторно ќе остане пред истиот европски ѕид, со различни толкувања за тоа кој го поставил.
