Skip to content
Груевски со мини бизнис во Унгарија и лани заработил илјадници евра од консултантска фирма без вработени, објави унгарскиот медиум 444, повикувајќи се на годишните финансиски извештаи на компанијата I.C.I.C. Kft., регистрирана во Пецел, близу Будимпешта.
Според 444, фирмата што Никола Груевски ја основал во летото 2021 година како консултантска компанија и натаму останува мала, но стабилна. Нема вработени, не пораснала во изминатите пет години, но секоја година бележи приходи и добивка од советодавни услуги.
Во 2025 година компанијата пријавила приход од 3,4 милиони форинти, по 4,1 милиони форинти една година претходно. Бидејќи консултантската дејност не бара големи трошоци, значителен дел од приходите останал како добивка. Според унгарскиот медиум, фирмата завршила со профит од речиси 2 милиони форинти, односно околу 5.650 евра.
За разлика од 2024 година, кога Груевски извадил 2 милиони форинти како дивиденда, лани парите не ги подигнал, туку ги оставил во компанијата. Од основањето на фирмата во 2021 година, според објавените податоци, тој досега подигнал вкупно 16,2 милиони форинти дивиденда, односно околу 45.760 евра.
Новиот годишен извештај покажува и дека парите на банкарската сметка на компанијата се зголемиле од 8 на 9 милиони форинти до крајот на минатата година. Истовремено, се зголемиле и обврските на фирмата: од 2,5 милиони форинти во 2024 година на 3,3 милиони форинти на крајот од 2025 година.
Најголемото неодговорено прашање останува кој ги плаќа консултантските услуги на Груевски. 444 пишува дека од годишните извештаи може да се насети дека тој можеби има фиксен клиент, кој секоја година плаќа милионски суми во форинти за неговите совети. Но, името на тој клиент не е објавено.
Во унгарскиот контекст, случајот добива и политичка тежина. Груевски од 2018 година живее во Унгарија, каде што доби азил откако избега од Македонија пред да ја издржи затворската казна во случајот „Тенк“. Унгарскиот истражувачки портал VSquare објави дека тој во 2022 година добил и унгарско државјанство врз основа на „унгарски државен интерес“, што дополнително ја комплицира можноста за негова екстрадиција.
Министерството за правда на Македонија, пак, соопшти дека, независно од информациите за неговиот статус во Унгарија, Груевски останува македонски државјанин и лице опфатено со правосилни судски одлуки и активни постапки. Од таму најавија дека постапката за екстрадиција продолжува преку правни и дипломатски канали.
Мини бизнисот на Груевски така станува повеќе од обична сметководствена белешка. Тој открива дека поранешниот премиер, осуден во Македонија и санкциониран од САД, во Унгарија не само што останува правно заштитен, туку и продолжува да остварува приходи преку консултантска фирма чии клиенти јавноста сè уште не ги знае.
