Skip to content
Се повеќе е реална можноста конфликтот меѓу Иран и Израел дополнително да ескалира и да се прошири до напади врз клучни економски цели, особено врз нафтени и гасни постројки во регионот на Персискиот Залив, кој е еден од најбогатите енергетски подрачја во светот.
Иран може да го затвори Ормутскиот теснец, најважниот воден пат во светот за енергија и затоа овој премин повторно е во центарот на вниманието.
Во првиот бран напади во петокот, израелските воздушни напади не ја насочија нафтената инфраструктура, што делумно го намали притисокот врз пазарот и придонесе за привремено смирување. Сепак, вчера иранските медиуми известија за пожарот во гасното поле Јужен Парс, во покраината Бушер на југот на Иран, кој избувна по израелскиот напад врз енергетската инфраструктура. Станува збор за гасно поле кое се наоѓа во Персискиот Залив, во близина на морската граница со Катар.
Ирански закани
Државната новинска агенција Тасним објави дека избувнал пожар во една од четирите единици во Фаза 14, привремено запирајќи го производството на 12 милиони кубни метри гас од платформата додека не се врати целосната функционалност, пишува Ал Џезира.
Новинската агенција ИРНА ја пренесува изјавата на Есмаил Ковсари, член на парламентарниот комитет за безбедност, кој рече дека Иран сериозно размислува за затворање на стратешкиот Ормутски теснец.
Ормутскиот теснец, кој се наоѓа помеѓу Оман и Иран, е најважниот светски пат за транспорт на сурова нафта, преку кој поголемиот дел од нафтата од регионот на Персискиот Залив поминува до остатокот од светот, како и значителни количини на течен природен гас (LNG).
Крвотокот на енергетската индустрија
Тоа е тесен морски премин што го поврзува Персискиот Залив со Оманскиот Залив и Индискиот Океан и се смета за „крвот на светската енергетска индустрија“, бидејќи околу две третини од вкупната светска нафта наменета за извоз се транспортира низ него. Во најтесниот дел, тој е широк само 33 километри, а самите пловни коридори – влез и излез – не надминуваат три километри во ширина во секој правец.
Околу 20 милиони барели нафта, кондензат и гориво минуваат низ овој премин секој ден, што претставува околу една петтина од вкупната дневна потрошувачка на нафта во светот. Поголемиот дел од тој извоз доаѓа од земјите од Персискиот Залив на ОПЕК – Саудиска Арабија, Иран, Обединетите Арапски Емирати, Кувајт и Ирак – и е насочен кон азискиот пазар.
Честа точка на конфликт
Низ историјата, Ормутскиот теснец бил честа точка на меѓународен конфликт. За време на војната во 1973 година, Иран привремено го прекина извозот на нафта во Соединетите Американски Држави и европските земји поради нивната поддршка за Израел. Денес, тој е сè уште главната точка на тензии меѓу Техеран и Западот и потенцијален повод за нови глобални кризи.
Експертите предупредуваат дека секој обид за затворање на овој стратешки клучен премин би можел сериозно да ја наруши глобалната трговија со енергија и да предизвика драстично зголемување на цените на нафтата и гасот на светските пазари.
