Skip to content
Мо Гавдат, поранешен директор во иновациската лабораторија Google X, изјави дека вештачката интелигенција претставува сериозна закана за работните места, без разлика дали станува збор за извршни директори или почетници во индустријата.
Во подкастот „Diary of a CEO“, Гавдат истакна дека тврдењата дека ВИ ќе отвори нови работни места се „стопроцентна глупост“.
Гавдат, кој има над 30 години искуство во технолошката индустрија, даде пример со својата компанија Emma.love, каде што со само тројца програмери и помош на ВИ развиле апликација за која порано би биле потребни околу 350 луѓе.
Според него, дури и работни места кои традиционално се сметаат за „човечки“ како видео монтажери, подкастери и менаџери, ќе бидат заменети. Тој додава дека дури и директори на компании ќе бидат заменети, особено оние кои не покажуваат способност за раководење.
Од друга страна, дел од технолошките лидери имаат поинакво мислење. Милијардерите Марк Кјубан и Џенсен Хуанг посочуваат дека учењето и примената на вештини поврзани со вештачката интелигенција ќе им даде предност на работниците. Тие веруваат дека вештачката интелигенција не е само закана, туку и можност за развој и унапредување на кариерата.
И покрај тоа што 41% од глобалните работодавци планираат намалување на бројот на вработени поради ВИ, дури 77% од нив планираат преквалификација на постојниот кадар, според Извештајот за иднината на работата за 2025 година од Светскиот економски форум.
Гавдат смета дека оваа трансформација ќе бара општествени промени, како воведување на универзален основен доход (UBI), каде секој граѓанин би добивал редовен приход без обврска да работи. Тој предупреди дека за да се реализира вакво општество, мора да се решат и потенцијалните закани од „жедта за моќ, алчноста и егото“, повикувајќи на етичка употреба и регулација на ВИ.
Вештачката интелигенција веќе не е научна фантастика, туку е дел од реалноста и го менува начинот на кој работиме и живееме.
