Skip to content
Опозициската СДСМ бара одговори од гувернерот на Народната банка, Трајко Славески, за работењето на Алта банка, обемот на паричните трансфери во Македонија и проблемите со кои, според партијата, се соочуваат граѓаните при пристапот до своите пари.
Од СДСМ обвинуваат дека Славески ја уверува јавноста оти „сè е во ред“ со банката, додека, како што наведуваат, експозитурите не работат, а граѓаните чекаат со часови пред банкоматите за да подигнат пари.
Партијата прашува зошто не се објавуваат податоци за висината на средствата што, според неа, српскиот претседател Александар Вучиќ ги префрлил во Македонија, како и дали парите останале во земјава или продолжиле кон Москва.
„Сега, кога контролата е преземена, не можат да кажат дека не знаат“, наведуваат од СДСМ, барајќи транспарентност за трансферите и за евентуалните поврзаности со лица од македонската власт.
Од опозициската партија прашуваат и дали претставници на власта имаат сметки во Алта банка. Притоа, се повикуваат на информации за приведени лица во Србија поврзани со банката и за поднесени кривични пријави, без во соопштението да наведат дополнителни детали за конкретните случаи.
СДСМ тврди дека во Македонија сè уште не се соопштува обемот на спорните трансфери, додека од Народната банка, според партијата, се испраќаат уверувања дека банката е во добра состојба.
„Ако е така, зошто граѓаните не можат да си ги подигнат заштедите?“, прашуваат од СДСМ, посочувајќи дека, според нивните тврдења, проблемите особено ги погодуваат пензионерите и другите граѓани што имаат сметки во банката.
Од партијата го повикуваат Обвинителството да реагира и бараат институциите да утврдат што се случувало со паричните трансфери и дали постојат основи за истрага.
СДСМ го обвинува гувернерот дека со мерките што ги презема ги штити интересите на лица поврзани со сомнителни финансиски активности, наместо да ги заштити штедните влогови на граѓаните.
Извор: СД
