Skip to content
Меѓународната агенција за атомска енергија (МААЕ) предупреди дека тековната воена ескалација меѓу Израел и Иран сериозно ги загрозува човечките животи и носи потенцијален ризик од истекување на радиоактивни материи.
На вонреден состанок на Одборот на гувернери, генералниот директор Рафаел Гроси ги повика страните да покажат максимална воздржаност и изрази загриженост дека судирот може да ги поткопа дипломатските напори за ограничување на нуклеарната програма на Иран.
„Воената ескалација ги зголемува изгледите за истекување на зрачење со сериозни последици за луѓето и животната средина, а воедно ја оддалечува перспективата за дипломатско решение“, истакна Гроси.
Тој информираше дека иранскиот нуклеарен комплекс Натанз, кој служи за збогатување на ураниум, бил значително оштетен во израелските напади минатиот петок. Иако подземниот дел не бил директно погоден, прекин на електричната енергија може да има влијание врз чувствителната опрема во објектот.
Во однос на евентуална радијација, Гроси истакна дека радиоактивноста надвор од комплексот останала на нормално ниво и нема индиции за надворешно радиолошко влијание врз населението.
Освен Натанз, четири нуклеарни објекти во Исфахан, исто така, претрпеле штета. Сепак, засега нема податоци за оштетувања во централата Форд, Бушер или реакторот што е во изградба.
Инспекторите на МААЕ остануваат во Иран и се подготвени да го продолжат мониторингот веднаш штом безбедносните услови го дозволат тоа.
Агенцијата во својот последен извештај посочи на значително зголемување на залихите на ураниум за потенцијална воена употреба, иако Техеран постојано негира дека има намера да развие нуклеарно оружје.
