Најмалку 40 убиени во Газа: „Очекувавме храна, тоа беше стапица“

Најмалку 40 лица, од кои половина во близина на центар за дистрибуција на хуманитарна помош, загинаа денес во израелски оган во Појасот Газа, соопшти Министерството за здравство на енклавата. Медицински извори јавуваат за над 200 повредени, а инцидентот предизвика жестоки меѓународни реакции.

Најтешкиот напад се случи во Рафа, во момент кога стотици Палестинци се обидувале да добијат храна. Очевидци тврдат дека израелски војници отвориле оган врз насобраната толпа во обид да ја контролираат ситуацијата. Израел засега не ги коментира директно случувањата, но во минати случаи ја обвинуваше групата Хамас за поттикнување насилства во вакви ситуации.

Израел неодамна ја предаде контролата врз дистрибуцијата на помош на новоформираната фондација GHF, поддржана од САД, која работи на пунктови обезбедени од израелски војници. Според хуманитарни организации, ваквиот пристап е „непристоен и опасен“.

„Отидовме таму за храна, а некои никогаш не се вратија. Тоа беше стапица“, изјави Ахмед Фаџад, еден од преживеаните. Телата на жртвите беа донесени во болницата Насер, каде семејствата ги оплакуваа своите најблиски.

ОН: „Израел го користи гладот како оружје“

Обединетите нации остро го осудија новиот систем за дистрибуција на храна. Раководителот на Агенцијата за палестински бегалци на ОН (UNRWA), Филип Лазарини, изјави дека гладни цивили се убиени обидувајќи се да дојдат до помош.

„Израел го користи гладот како оружје“, рече Лазарини, додавајќи дека Израел не ги укинал ограничувањата за ОН-агенциите, и покрај зголемениот притисок и достапноста на хуманитарна помош.

Високиот комесар за човекови права на ОН, Фолкер Тирк, оцени дека „израелските методи на војување предизвикуваат ужасни, нехумани страдања“ и ја повика меѓународната заедница на итна истрага за смртните случаи кај цивили.

Од почетокот на операциите на GHF, палестинското Министерство за здравство соопшти дека најмалку 300 лица се убиени, а повеќе од 2.600 се ранети во близина на центрите за дистрибуција.

Израелската страна тврди дека дозволила влез на стотици камиони со хуманитарна помош, но инсистира таа да не заврши во рацете на милитантите. Хамас ги негира обвинувањата за пренасочување на храна и ја обвинува израелската армија за „систематско уништување на човечкото достоинство во Газа“.