Новак Ѓоковиќ почна да јаде месо

Иако со години следеше строг режим на исхрана базиран на растителни намирници, Новак Ѓоковиќ повторно јаде месо, а оваа информација, прво ја потврди неговиот пријател Семир Османагиќ, изјавувајќи дека најдобриот тенисер во светот јаде месо веќе година и пол, а потоа се појавија и сведоштва од келнери од ресторани што ги посетувал. Според нив, Ѓоковиќ нарачувал пилешко, а некои угостители тврдат дека за време на престојот во Сараево јадел и ќебапи.

Имено, Новак Ѓоковиќ пред натпреварот БиХ – Италија за пласман на Светското првенство застанал во сараевската ќебапчилница „Жељо“.

Оваа промена претставува голем пресврт во однос на исхраната што Ѓоковиќ ја следеше со години. Откако го исфрли глутенот, а потоа и шеќерот, неговата доминација во светскиот тенис започна во 2011 година. Со години беше познат по тоа што избегнуваше месо, а исхраната му била толку строго контролирана што, на пример, година и пол не јадел ниту парче чоколадо. Дури по освојувањето на Australian Open 2012 година си дозволил една коцка.

„Сакав само едно: да пробам чоколадо. Не го имав вкусено од летото 2010. Милјан ми донесе слатко. Скршив едно парче, мало парче, и го ставив во уста. Го оставив да се стопи на јазикот. Тоа беше сè што си дозволив. Тоа е она што е потребно за да се стане број еден“, изјави тогаш Ѓоковиќ.

Став за веганската исхрана

Иако многумина го сметаа за веган, Ѓоковиќ еднаш на Ролан Гарос појасни дека не е веган, туку дека исхраната главно му е базирана на растителни намирници, но јаде риба и јајца како извор на протеини.

„Во растителната исхрана има многу извори на протеини, иако многумина знаат само за месо, кое во нашата култура е речиси неизбежна намирница. Во август 2015 одлучив да престанам да јадам месо. Имам свои причини, и етички и здравствени. Не сакам да се враќам на месо ниту да подлегнам на тој притисок. Луѓето што не се доволно информирани донесуваат погрешни заклучоци“, рече тогаш.

Неговиот ден започнувал со чаша млака вода со лимон, по што следел сок од целер на празен желудник. Потоа пиел зелен смути со алги, овошје и додатоци. Во првиот дел од денот јадел многу овошје и салати и избегнувал храна што бара повеќе енергија за варење. Најчесто консумирал киноа, дива ориз, просо, батат и компир, најчесто подготвени на пареа.

Исто така практикувал и повремен пост, со периоди во кои не јадел и до 16 часа.

Неговата исхрана се базирала на избегнување глутен и млечни производи, намален шеќер и храна богата со зеленчук, мешунки, риба, јаткасти плодови и семиња. Црвеното месо целосно го исфрлил, а секогаш пиел млака вода веднаш по будење и темелно ја џвакал храната за подобро варење.