Skip to content
На границата помеѓу Естонија и Русија, симболичката борба околу историјата и современата агресија доби ново поглавје. Русија, по традиција, го одбележа 9 мај – Денот на победата над нацистичка Германија – со емитување на воена парада од Црвениот плоштад. Големи екрани беа поставени на рускиот брег на реката Нарва, свртени директно кон Естонија.
Но, оваа година, Естонија одговори директно и остро. Музејот во граничниот град Нарва постави огромен транспарент на ѕидот на истоимениот замок, насочен кон Русија. На транспарентот рускиот претседател Владимир Путин е прикажан како „Патлер“ – игра на зборови што го изедначува со Адолф Хитлер – заедно со пораката: „ПАТЛЕР ВОЕН ЗЛОСТОРНИК“.
„Ова е нашата порака, потсетник за тековната војна од големи размери и за воените злосторства што се извршуваат,“ изјави директорката на музејот, Марија Сморжевских-Смирнова. Таа нагласи дека транспарентот е поставен токму на 9 мај – Денот на Европа, кој во Естонија се слави како симбол на мирот, слободата и европските вредности.
„Додека Русија се обидува да го слави наводниот антифашизам, реалноста е дека денес гледаме агресија, диктатура и злосторства што потсетуваат токму на тоа против што се бореше Европа во Втората светска војна,“ додаде таа.
Настанот ги заострува тензиите меѓу двете земји, особено во контекст на руската инвазија на Украина која влегува во својата четврта година. Естонија, како членка на ЕУ и НАТО, веќе одамна го има заострено својот однос кон Москва, но ваквите јавни и визуелно силни пораки стануваат сè почести на симболичко ниво.
Паралелно со ова, Русија продолжува со својата традиција на емитување воени паради, фокусирајќи се на величање на советската победа во 1945 година, но се повеќе користејќи ја оваа нарација за легитимирање на современите воени акции.
